US, UK leh Canada-in Myanmar senior official-te hrekna siam
United States, United Kingdom leh Canada chuan Myanmar sipaite'n civil sorkar paihthlaa thuneihna an hnehchhuh aṭanga kum khatna, nimin khan Myanmar-a senior official-te hrekna an siam.
US Department of the Treasury chuan Attorney General Thida Oo, Supreme Court chief justice Tun Tun Oo leh Anti-Corruption Commission chairman U Tin Oo te chu politics kaihhnawih thila Aung San Suu Kyi heknaah inhnamhnawihna an nei nia sawiin hremna hi a siam. US Treasury leh State deparmtent chuan Myanmar civil sorkar paihthlak a nih champhaah he hrekna hi an puang a ni.
UK pawhin Thida Oo, Tin Oo leh sipai bang , sorkar paihthlak hnu lawka election commission chairman atana ruat U Thein Soe-te hrekna thar hi an tichhuak ve bawk.
"United Kingdom leh Canada te nen ṭangkawpin khawvel ramdangte hian Burma mipui kan thlawp zia lantir nan hmalakna hi kan kalpui a, sipaite kut tuara tlanchhiate venhim tumin theihtawp kan chhuah dawn a ni," tiin US Secretary of State Antony Blinken chuan thuchhuah a siam.
"United States chuan mihring zalenna rahbehna leh tharum thawhna tihtawp a, dan dik lo taka hren beh mekten zalenna famkim an chan theih nan leh Burma ramin mipui rorelna an tundin leh theihnan ram dangte nen thawhho zel kan tum a ni," tiin Blinken chuan a sawi.
Britain Foreign secretary Liz Truss chuan Myanmar sipai rorelna hnuaiah Myanmar mipuite chu thlabar tak siam a, an kuta intulut tura siam an tum a ni, a ti. "Hlauhna leh tharum thawhna hmangin mipuite zingah inṭhendarh tirna leh inrem lohna an siam a ni. UK chuan right to freedom, democracy leh rule of law venghim zel turin theihtawp a chhuah dawn. Kan ngaihdan min ṭawmpuitu ramdangte nen, sipai rorelna rawng tak hi tihtawp tumin hma kan la zel ang," a ti.
Canada sorkar chuan kum khat liamta chhung khan sipaite hian Myanmar-a mihring dikna leh politics lama inrahbehna thleng mek chu thlak danglam tumna engmah an neih loh thu a sawi. US-in a hrek mi pathumte chu a hrek ve nghal tih sawiin, heng mite hi "an thuneihna chu dan palzutna atana hmangin, politics-a an elpuite paihthlak nan an hmang a ni. He remna leh muanna tihchhiatna leh, security dinhmun derthawnga dahna a ni," tiin a sawi.
US hian sipai sorkar official-te a hrek bakah, Myanmar sipaite thlawptu leh sum hmanga pui ṭhin,sumdawng hruaitu leh company-te pawh a hranin hrekna a siam tel bawk. An zingah hian KT Group CEO leh KT Group subsidiary KTSL-a director ni bawk Jonathan Myo Kyaw Thaung, bakah Burma sipaite chunga silai leh ralthuam pe ṭhintu company ṭhahnem tak neitu Tay Za te an tel. Heng an mi hrekten US-a sum leh thil an neihte chu khawih chet theih loha dahsak an ni, America mite chu sumdawnna lama thawhpui lo turin a ti bawk a ni.