UK PM Johnson-a'n Parliament-ah ngaihdam dil

Britain prime minister Boris Johnson chuan Thawhṭannia khan Parliament inkhawmah Covid-19 kaihhruaina dan bawhchhia a, Downing Street-a party huaihawt a nih avangin ngaihdam a dil.

"Pawi ka ti hle tih ka sawi duh a ni. Mipuite thinur dan tur pawh ka hrethiam. Keimahni inenfiah a, kan inzir a ngai a ni," tiin senior civil servant Sue Gray-i'n official chenna hmuna party buatsaih a, lockdown dan bawhchhiat a nih chungchanga report a pek chu a pawm tih a sawi.

PM Johnson leh a staff-ten dan bawhchhia a, party an buatsaih avangin mipuite pawh an thinrim hle a, Conservative MP zingah pawh PM bang tura phutna pawh a awm a ni.

Gray pawh chuan a report-ah hian, 'Hri leng karah, sorkarin mipuite kaihhruaina dante zawm tura a ngen reng laiin, hetiang thil lo buatsaih hi ngaihthiam a harsa hle a ni. Pungkhawm zingah hian sorkara mi pawimawh tak tak an tel. Midangte hriselna dinhmun an tihderthawn theih dan te, mipui hmuha an lan dan turte an ngaihtuah lo a ni. No. 10 leh Cabinet office-a thil thlengah hian hruaitu hlawhchhamna a lang," tiin a sawi.