Maldive inthlanah Solih-an hnehna chang

Pathianni-a Maldive President thlanna neih zawh takah eptu pawl candidate Ibrahim Mohamed Solih chuan President ṭanglai Abdulla Yameen a hneh. Official result erawh chu September 30-ah tihchhuah a nih dawn chauh niin Election Commission chuan a sawi.

Inthlan result hriat hnuah President thar tura thlan tlin, Solih chuan mipuite chungah lawmthu sawiin, Maldive ram mipuite chuan an ram inrelbawlna thlak a, boruak muanawm leh rorelna dik an duhzia an tilang a ni, a ti. President Yameen pawh mipuite duhthlanna chu pawm turin a ngen a, ram danpui hnuaiah boruak ṭha tak hnuaiah thuneihna pawh inhlanchhawn theih a duh thu a sawi.

Solih-a thlawptu mi tam tak chu Male-a campaign centre bulah pungkhawmin a tlin hi an lawm a ni. Solih-a party, Maldivian Democratic Party hotu chuan inthlan result chuan an ram chu democracy kawng dikah a hruai kir leh dawn ta a ni, a ti.

Kumin February thlaa Supreme Court-in eptu pawl hruiatu pakua-te thiam loh chantir an nihna a tihtawpsak chu President Yameen chuan hnawlin state of emergency a puang zui a, hei vang hian tualchhung boruak pawh a ṭha lo chho hle a ni. President Yameen-a kaihhruai sorkar hian inthlan dawnah eptu lam hruaitu eng emaw zat chu manin jail-ah a tantir a, man zingah hian president hlui leh a unaupa Maumoon Abdul Gayoom pawh a tel. Inthlan neih hma ni, Inrinni khan police-te chuan eptu pawl campaign office pui ber an lo dapsak bawk a, mi panga an man leh a ni.

European Union leh US chuan Maldive inthlan tur hi a ngaihven hle a, democracy dinhmun in hma a sawn chhoh zel loh chuan an ram hrekah pawh an lo vau tawh hial a ni.

President atana thlan thar, Solih hi kum 56 mi niin democracy activist a ni ṭhin a, Parliament-ah majority leader a ni tawh bawk. President Yameen-a kaihhruai sorkarin an party MDP hruaitu pawimawh tak takte man a, a ṭhen ram pawn lama an tlanchhiat hnuah party president candidate atan hian ruat a ni. Sri Lanka-a tlanchhia, party hruaitu leh presidnet hlui Mohamed Nasheed pawhin inthlan hi chuh leh a tum a, mahse Supreme Court chuan thiam loh chantir a nih tawh vangin a disqualify a ni.