Cuba President-in United States a tlawh

Cuba President thar Miguel Diaz-Canel chu Pathianni khan New York a thleng a, US a tlawhna hmasa ber a ni.

US President hlui Barack Obama hnuaia Cuba leh US in hun rei tak an inkar boruak ṭha lo siamṭhat tuma palai an intirh tawn ṭan leh hnuah, President Donald Trump chuan nikum khan Cuba rama bungraw thawnluh chungchangah hrekna a siam leh a ni. Hei bakah hian Cuba khawpui, Havana-a US diplomat-te chu an hriselna atana hlauhthawnawm zawnga beih an tawk fo niin a sawi bawk. Hei vang hian ram pahnihte inkar boruak hi a chhe chho leh a ni. Cuba sorkar chuan American mite beihna thleng a awm lo tih sawiin, President Trump-a kaihhruai chuan an ram a dona tur chhuanlam atana a remchang apiang a hmang mai niin a puh.

Cuba President thar Diaz-Canel hian April thla khan Raul Castro a thlak a, nimin khan UNGA Nelson Mandela Peace Summit-ah thu sawiin, naktukah UN General Assembly-ah thu a sawi leh ang. He hunah hian Cuba chuan US-in sumdawnna lama a hrekna tihtawp phutna resolution siam tura ngenna pawh a sawi ang.