Israel-in Palestinian-te ni riat hun pe

Israel sorkar chuan Palestinian ram a luah, West Bank-a Bedouin khuaa cheng Palestinian-te chu an khua chhuahsan turin ni riat hun a pe. Mi 180 chenna Bedouin khua hi Israel sorkar chuan ṭhiah a tum a ni.

Bedouin khua, Khan al-Ahmar ṭhiat tum chungchangah hian Israel Supreme Court-ah petition thehluh a ni a, mahse court chuan appeal-na hi a hnawlsak a ni. Hemi hnu, Pathianni khan Israel sorkar chuan he khuaa chengte chu ni riat chhunga an khua chhuahsan turin a hriattir a ni.

Israel defence ministry chuan sorkar thupek chu an zawm duh loh anih chuan court thutlukna lo siam tawh angin an in te chu ṭhiah luihsak an ni dawn tih a sawi. Khan al-Ahmar a chengte hi khaw dangah sawn an tum a ni. Heihi Palestinian bakah ramdangte pawhin an sawisel a, tun thla tir lam khan Britain, France, Germany, Italy leh Spain chuan Israel sorkar hnenah he khua hi ṭhiat lo turin an lo ngen tawh bawk a, a khuaa chengte tan nghawng ṭha lo tak a neih dawn bakah, Israel-Palestinian inremna siam tuma hmalakna kawng thlengin nghawng a nei dawn a ni, an ti.

Hetihlai hian Khan al-Ahmar khuaa chengte hian an khua hi chhuahsan an tum loh thu sawiin, thuneitute chuan tharum hmanga an nawrchhuah a ngai ve dawn tih an sawi. Anmahni ram ngeiah an awm a, kalsawn an tum lo tih an sawi.