Maldives president-in a chak loh pawm

Maldives President Abdulla Yameen chuan Pathianni-a an ram president thlanna neih zawh takah a chak lo tih a pawm thu a sawi.

Inthlan result hi official-a tihchhuah la ni lo mah se, eptu pawl candidate Ibrahim Mohamed Solih chuan President Yameen hi hnehin, Maldives President thar atan thlan tlin a ni.

President Yameen chuan Maldives mipuiten an duh an thlang a, inthlan result hi a pawm tih a sawi. President thar atana thlan Solih pawh hmuin lawmpuina pawh a hlan thu a sawi bawk.

Inthlan buatsaih hma hian President Yameen-a kaihhruai sorkar hian eptu pawl hruaitu eng emaw zat manin a hnawtchhuak bawk a, vote thlak ni hma lawkin eptu pawl campaign headquarters pawh police-ten an dap bawk. Hei vang hian Yameen hian inthlan result hi a pawm duh lo mai hlauhthawnna a awm a, thuneihna a hlanchhawn duh lo ring emaw zat an awm a ni. Mahse Yameen chuan inthlan result a pawm thu leh, a chak loh a pawm thu hi TV-a thu a sawinaah a sawichhuak ta a ni.

President thar tur thlannaah hian vote a tla ṭha hle a, 90% dawn a tling pha a ni. Mi ṭhenkhat chu vote thlak hun nghakin darkar nga chuang an intlar a ni.