Iran hotuin pawikhawihtute puiah Saudi leh UAE a puh

Iran ram hotu lu ber, Ayatollah Ali Khamenei chuan kar kalta Inrinni-a an ram chhimthlang lam, Ahvaz khawpui military parade neihna hmun beitute chu sum hmanga ṭanpuiah Saudi Arabia leh United Arab Emirates a puh. He pawikhawihna thlengah hian mi 24 an thi a ni.

Khamenei chuan a official website-ah hemi chungchang hi sawilangin, "Report hrang hrang aṭanga a landanin, pawikhawitute hi Iraq leh Syria rama harsatna an tawha America miten an chhanchhuah, Saudi leh UAE in sum hmanga a puihte an ni", a ti. Pawikhawihna thlentute nihna kimchang erawh a sawilang lo a, firfiakte tiin a sawi a, Iran chuan he pawikhawihnaa inhnamhnawihte chu hremna na tak a pek tur thu a sawi.

Ahvaz khawpuia military parade neihna hmun beih a nih hnu hian Iran thuneitute chuan he pawikhawihna thlentute hi Arab firfiakte nia an rinhlelh thu an sawi a, heng mite hi Syria ramah an inbengbel lo niin an sawi bawk.

Iran Revolutionary Guard hotu chuan Ahvaz-a pawikhawihna thlengah hian US leh Israel pawh an inhnamhnawih niin a puh bawk a, chhanna na tak an pe let dawn tih a sawi. He pawikhawihna thleng kaihhnawihah hian mi 22 man an ni tawh tih Intellingence ministry chuan a tarlang bawk a ni.