Sweden PM-in fiahna paltlang zo lo

Sweden Prime Minister Stefan Lofven chuan Thawhlehni khan Parliament-ah fiahna a paltlang zo lo a, PM a nihna aṭanga a ban a ngai dawn.

September 9-a inthlanpui neihah khan party mala sorkarna siam pha an awm lo a, Lofven-a kaihhruai centre-left bloc hian seat 144 lain party mala seat la hnem ber an ni a, centre-right opposition Alliance aiin seat khat chauhin a la hnem a ni.

Seat la hnem ber an nih avangin Social Democrats hotu Lofven hi prime minister-ah dah a ni a, mahse nimina fiahnaah thlawptu a ngah tawk ta lo a ni. Parliament-a vote lakah hian Lofven-a thlawptu lamah vote 142 a tlak laiin, a thlawp lo lamah vote 204 a tla thung.

PM-in fiahna a paltlang tak loh avangin parliament speaker chuan prime minister thar tur a rawt dawn a, centre-right leader Ulf Kristersson chu a rawt rin a ni. Amah thlaktu tur ruatfel a nih hma chuan Lofven hi caretaker prime minister angin a awm zui rih ang.

Lofven-a thlawp lo lamah hian member 62 nei, anti-immigration Sweden Democrats (SD) pawh an tel. Hetihlai hian centre-right leh centre-left block te hian SD hi thawhpui an duh lo ve ve nia sawi a ni. Hetihlai hian Lofven chuan party lian ber an nih avangin sorkar siam chhunzawm dan kawng an zawng zel dawn tih a sawi a, prime minister nih chhunzawm theihna tur remchang a la awm dawn niin a sawi. Inthlan ṭhat buatsaih leh nghal chu mipuite duhdan pawh a ni dawn lo tih a sawi a, hemi rual hian SD nena thawkdun sorkar chu englai maha thlawp an tum lo tih a sawi bawk.

Centre-left block-ah hian Social Democrats leh Green Party an tel a, centre-right bloc-ah hian Kristersson-a party Moderate party bakah party dang pathum–Centre Party, Christian Democrats leh Liberals an tel a ni. SD hi nationalist, anti-immigration party niin neo-Nazis bakah far-right group nen hun rei tak inzawmna nei tawh nia sawi an ni a, kum 2010 khan Parliament-ah hian member an nei ṭan ve chauh a, mahse tunah chuan party lian pathumna a ni pha tawh a ni.