US-in Venezuela president nupui hrek

United State Treasury chuan Vene-zuela President Nicolas Maduro-a nupui Cilia Adela Flores de Maduro, vice president Delcy Rodriguez leh Maduro-a thawhpui hnai ṭhenkhatte hrekna a siam.

US President Donald Trump chuan hrekna siam a nihna chhan Venezuela rama mipuite tawrhna nasa tak thlengah mawhphurtua ngaih an nih vang a ni, a ti. Trump chuan Venezuela ram mipuite dinhmun chu a chhe hle tih sawiin, Maduro-a kaihhruai sorkar leh anmahni thlawptu Cuba-te rorelna hnuaiah mipuite awpbeh an nih vangin mi maktaduai hnih chuang zet chu an tlanchhe tawh a ni, a ti. Maduro-a rorelna hnuaiah oil ngah ram Venezuela chu sum lamah a tlachhia a, mipuite chu dinhmun rethei takah hnuhluh an ni tih a sawi.

UN General Assembly-a thu a sawinaah President Trump chuan Venezuela chu khawvela hmun ṭha lo ber zinga mi a ni tiin, Maduro sipaite chu an president lakah hian hel duh se chuan awlsam takin an paihthla thei ang, a ti.

US Treasury in hrekna a siam thar zingah hian Communication Minister Jorge Rodriguez leh Defence Minister Vladimir Padrino Lopez-te pawh an tel. Hrekna an siamin a huamte hian US-a an thil neih leh ramte chu khawih chet theih loha hreksak an ni dawn a, US institution-te chu heng mite hi thawhpui lo tura tih an ni bawk. President Maduro hrekna chu kum 2017, July 31 khan siam a lo ni tawh a ni.