Pompeo-a'n North Korea a tlawh dawn

US State Department chuan Secretary of State Mike Pompeo chuan thla thar hian North Korea a tlawh dawn tih a sawi.

Mike Pompeo hian US leh Democratic People's Republic of Korea (DPRK) hruaituten summit an neih leh tur chungchang a sawipui dawn a ni.

NKorea foreign minister Ri Yong Ho nena meeting an neihnaah, NKorea hotu Kim Jong-un-a'n October thlaa an ram tlawh tura a sawmna a pawm thu Pompeo hian a sawi a ni. North Korea ram a tlawh tur hi US-NKorea ram hruaituten Singapore-a summit an lo neih tawha an inremna siam tawhte a taka kalpui a nih dan leh, hmasawn dante enfiah tur bakah, US President Trump leh NKorea hotu Kim ten summit an neih leh tur atan buaipui tur a nih thu state department thuchhuah chuan a tarlang.

CBS News-in a kawmnaah Pompeo hian ram pahnih hruaitute meeting vawi hnihna hi October thlaa neih a nih mai theih thu pawh a lo sawi tawh bawk.

June thlaa Singapore-a Trump-Kim summit neih ṭum khan ram pahnih hruaitute hian thuchhuah inṭawm siamin, an inlaichinna siamṭhat a, Korean Peninsula-a boruak muanawm a awm theihna tura thawh dunte an remti a ni.