Malaysia PM hlui nupui Rosmah Manor thu zawtfiah

Malaysia prime minister hlui Najib Razak-a nupui, Rosmah Mansor-i chu investigator-ten sorkar sum tam tham tak tihchingpen kaihhnawihah darkar 13 dawn thu an zawtfiah.

Thil man to tak tak leina atan sum hmang nasa leh, khawsak hautak tak, Rosmah Mansor-i hi Nilaini-a an ram huna chawhma dar 10-ah khan anti-corruption agency hmaah a inlan a ni. Official-te chuan state fund, IMDB-a sum tam tak tihchingpena puhna chungchanga an chhuina chu an zo fel dawn hnai tawh a, thubuai pawh siamsak thuai a nih rin a ni.

Kumin May thlaa Malaysia president thlanna neiha a pasal, Najib Razak-a paihthlak a nih hnuah Rosmah Manor-i hi anti-corruption agency hian ṭum hnih thu an zawhfiahna a ni tawh a ni. Najib Razak-a hi a IMDB fund aṭanga a mimal bank acccount-ah dollar maktaduai 700 chuang zet sawnah puh a ni a, eiruk thubuai bakah a thuneihna dik lo taka hmanga puhna thubuai a nei mek a ni.

Najib-a thubuai hi prime minister a nih laiin tihtawp a ni tawh a, mahse sorkar thar a din hnuah an hawng thar leh a ni. Kuala Lumpur leh hmundanga Najib-a inte chu dap a ni tawh bawk a, heng hmun aṭang hian pawisa tam tham tak bakah tlereuh leh designer handbag, dollar maktaduai 273 hu mansak an ni tawh. Rosmah hi a pasalin thuneihna a chan lai hian sum a hmang nasa a, rampawn lama zinchhuah leh bazar nuam ti tak niin, designer handbad leh tlereuh manto tak tak a lei nasat avangin mipui pawh a chungah an lawm lo hle bawk. Kum 1986-a Philippine president aṭanga paihthlak, Ferdinand Marcos-a nupui, Imelda Marcos-a in nen tehkhin an ni fo ṭhin. Imelda hian pheikhawk bun chuang a neih avangin sawizui a hlawh hle a ni.