Canada MP-ten Suu Kyi chawimawina laklet remti

Canada Parliament chuan Myanmar ram hruaitu Aung San Suu Kyi-i hnena citizenship chawimawina an lo hlan tawh chu laklet a rel a, member-ten an remti.

Kum 2007 khan Canada chuan Syy Kyi-i hi an ram chawimawisa sang, honorary citizenship hi an hlan a, he chawimawina hi mi paruk chauh an la hlan a ni. Chawimawina hlan tur hian Parliament in hnihten joint resolution an siam a ngai a, an laklet sak leh a nih dawn pawn hetiang bawk an tih leh a ngai a ni. Suu Kyi-i hnena chawimawina an lo hlan tawh hi Myanmar rama Rohingya Muslim-te chunga tawrhna nasa tak thleng mekah Suu Kyi hian dem a hlawh hle a, Rohingya-te laka sipaiten beihpui an thlak chu a thlawp nia puh a ni.

Sipai rorelna hnuaia Myanmar a awm laia democracy tundin a nih theihna atana a beih avangin kum 1991 khan Suu Kyi-i hi khawvel chawimawina sang, Nobel Peace Prize hlan a lo ni tawh bawk.

Canada Foreign Minister Chrystia Freeland chuan, "Kum 2007 khan House of Commons chuan Aung Sang Suu Kyi hi honoray Canadian citizen status a lo pe tawh a, mahse he status a lo pek tawh lakkir leh a nih theih nan House chuan lungrual takin motion an pass leh ta a ni", a ti. House-a MP-ten vote an lak hma ni hian Prime Minister Justin Trudeau chuan Suu Kyi chu citizenship chawimawina nei zel tlak a ni em tih parliament-in a ngaihtuah dawn tih a lo sawi tawh a ni.

Myanmar ramah hian kum 2015 khan mipui thlan sorkar dingin, Suu Kyi chu State Counsellor-ah dah a ni. Mahse civil sorkar din a nih hnuah nikum August thla khan Rakhine state-a sipaiten beihpui an thlak avangin Rohingya Muslim nuai sarih dawn chu an tlanchhe tawh a ni. He thil thleng hi ram hrang hrangte chuan an dem thu an sawi fo a, Suu Kyi pawh sipaite chet dan demna thu sawichhuak turin an nawr fo. Mahse Suu Kyi hian an phut ang hian a sawi duh lo a ni.