Bangladesh PM-in Rohingya raltlante hruaikir thuai turin ngen

Bangladesh Prime Minister Sheikh Hasina-i chuan an rama Rohingya refugee awm mekte chu a hma thei anga Myanmar rama hruaikir turin a ngen.

New York-a UN General Assembly General Debate-a thu a sawiah, Hasina-i chuan raltlante hruaikir hna thawh ṭan a la ni lo chu pawi a tih thu a sawi. "Myanmar hi kan ṭhenawm ram a ni a, pawn lam aṭangin Rohigya-te buaina chinfel dante kan ngaihtuah pui a ni. Rohingya raltlante hruaikir an nih dan tur chungchangah Bangladesh leh Myanmar chuan inremsiamna pathum pawh kan nei tawh. Ṭawngkam chuan Rohingyate hruai kir ngei an tum thu intiam mah se, a takah chuan Myanmar thuneitute hian an la pawm thei lo a ni", a ti

Hasina-i chuan Rohinya buaina inṭanna chu Myanmar ramah a ni a, a chinfelna pawh Myanmar ramah a ni tur a ni, tiin a rang thei anga boruak ṭha tak hnuaia Rohingya-te buaina chu chinfel thuai a duh thu a sawi.

Bangladesh sorkar chuan raltlante awmna tur in hi a ngaihtuah mek a, "Raltlante hi an rama an la kir theih loh avangin, boruak ṭha leh hrisel taka an lo awm lailawkna tur ngaihtuah a ngai a ni" tiin Bangladesh PM chuan a sawi. An awmna tur hmun siamsak chungchangah international organization-te chu thawhpui turin a sawm bawk.