Israel-in a ruka atomic warehouse neiah Iran puh

Israel Prime Minister Benjamin Netanyahu chuan United Nations General Assembly-a thu a sawinaah, Iran chu a ruka atomic warehouse neiah a puh a, he hmun hi Israel intelligence agent-te chuan Tehran khaw chuanhnuai lamah an hmuchhuak a ni, a ti.

Benjamin Netanyahu chuan warehouse awmna hi January thlaa Israel agent-ten atomic weapon, warhead design leh production plan chungchang ziahna document phek 50,000 zeta tam leh computer disc eng emaw zat an hmuhna aṭanga mel thum vel chauha hlaa awm niin a sawi. Iran-in atomic warehouse a rukin a siam a tih chu a sawichhuah ṭum khatna a nih thu sawiin, he hmun hi nuclear weapons program a kalpuina hnuaia khawl leh hmanrua tam tham tak dahna atan hman a ni tih a sawi bawk.

Israel PM hian eng ang khawl leh hmanrua nge awm tih erawh a sawichiang lo thung. Netanyahu chuan warehouse awmna lai lanna map pawh a tilang a, Google Earth aṭanga en duhte tan pawh building awmna latitude leh longitude thlengin a tilang tel a ni. He building hi enfiah a phut thu a sawi nghal bawk a ni.

Iran Foreign Ministry chuan Israel PM thusawi chu thu dik lo, awmze nei lo leh ṭul lo tak niin a sawi.