Russia leh Pakistan-in MoU ziak

Russia leh Pakistan chuan Iran aṭanga Pakistan leh India-a underwater gas pipepline phumna tur project kalpui turin inremna, memorandum of understanding an ziak.

MoU hi Moscow-ah Russian Deputy Energy Minister Anatoly Yanovsky leh Pakistan Ministry of Energy Additional Secretary Sher Afgan Khan ten an ziak an ni. Russia hian inrenma an ziah chungchang hi Iran leh India a hriattir ve leh a ngai dawn a, India pawh he inremna ang bawk hi ziahpui leh an tum tih Yanovksy chuan a sawi.

He project hi Iran ram hrek a nih avangin kum 2013 khan chawlhsan a ni a, mahse 2017 aṭangin bul ṭan thar leh a ni. Kum 2017 November thla khan Russia leh Iran chuan inremna an lo ziak tawh a ni. Kumin March thla khan project kalpui dan tur chungchangah Russia-Iran working group chuan meeting hmasa ber an nei tawh bawk.

Yanovsky chuan Russia leh Pakistan chuan project dang, Pakistan-a Karachi leh Lahore inkara km 1,100-a thui North-South Gas Pipeline (NSGP) siam dan tur chungchangah inbiakna an nei mek bawk tih a sawi a, he pipeline hmang hian kum khatah gas cubic meter tluklehdingawn 12.3 thawn theih a ni dawn a ni, a ti.