Nigeria-a tuilian vanga thi 199 tling tawh

Nigeria rama tuilian vanga thi chu mi 199 an tling tawh.

Ruahsur nasa vangin state 12-te chuan tuilian hi an tuar a, central leh chhim lam state-ahte chuan national disaster puan a ni tawh a ni. National Emergency Management Agency (NEMA) chuan tuilian vang hian mi 286,000 chu chenna tur nei loin an awm niin a sawi a, ruah hi a la sur chhunzawm zel rin a ni tih a tarlang bawk. Tuilian hian khaw tam tak a chim bakah, thlai chinte a chhe nasa hle a, ranvulh tam tak an thi bawk a ni.

Nigeria hmarchhak lama Borno leh Yobe state-ah tuihri, cholera a leng mek bawk. Kar hnih kalta chhung khan he hri leng vang hian mi 97 an thi a, mi 3,000 chuangin tui hri hi an vei mek bawk a ni.