Kum 100 hnuah a ṭum khatna atan Australia-in state ramri khar

Australia state zinga mipui chen tamna pahnih Victoria leh New South Wales (NSW) te chuan hripui leng vangin vawiin aṭangin state ramri an khar dawn a, hei hi kum 100 hnua an khar leh hmasak berna tur a ni.

Kar hnih liam ta khan Victoria state-a Melbourne khawpuiah Covid-19 hri kai thar 100 chuang an awm a, he khua aṭanga hri kai thar hi Australia ram pumpuia hri kai thar aṭanga 95% a ni pha a ni. Hei vang hian an state ṭhenawm, New South Wales (NSW)-ah hri hi a darh loh nan tiin he state pahnih ramri hi khar tum a ni ta a ni. 

Victoria premier Daniel Andrews chuan an ram prime minister Scott Morrison leh an state ṭhenawm NSW premier Gladys Berejiklian rawn chunga thutlukna hi siam a nih thu a sawi. "State ramri te hi khar a nih dawn avang hian mi tam takin harsatna an tawk ang tih pawh ka ring a, mahse hri laka kan him tlan theih nan hengte kan tih a ngai ta a ni. Ramri khar a nih rual hian thil pawimawh leh a ṭulah chuan ramri kan tura phalna pekchhuak a ni ang," tiin

Andrews chuan a sawi bawk.  Australia-ah hian Covid-19 hri kai mi 8,586 an awm tawh a, heng zinga mi 7,420 chu enkawl dam tawh niin, he hri vanga thi hi mi 106 an awm tawh bawk a ni. 

Pakistan doctor 48-te chu Covid-19 hri laka invenna tur protective gear an indaihkhawp loh avangin Pathianni khan an hna aṭangin an bang. Heng doctor bangta te hi kum lama naupang zawkte an ni a, Punjab province-a government teaching hospital ; Lahore Mayo, Services, Jinnah, General, Lady Aitcheson, Children and Sheikh Zayed hospital, Faisalabad-a Civil hospital, SZH Rahim Yar Khan leh Nishter Hospital Multan-a thawkte an ni tih Punjab health department chuan a tarlang a, an banna hi pawmsak an ni tih a sawi nghal bawk.

Doctor-te hian Covid-19 hri kaite an enkawl a, an enkawlna lama hri an kai loh nan invenna ṭha an mawmawh thu te, an hmanraw neihte an indaih tawk loh thute chu sorkarah an thlen thu Lahore-a public hospital-a thawk doctor senior pakhat chuan a sawi. Sorkar hian doctor-te mamawh an ngaihsak loh chuan doctor dangte pawh an la ban mai theih thu doctor senior ṭhenkhatte chuan an sawi ve bawk. 

Pakistan National Institute of Health chuan an rama health professional 70 ai tam chu Covid-19 vangin an thi tawh tih a tarlang a, heng thi zingah hian doctor 47 an tel a, heng zinga doctor 35-te chu Punjab province-a mite an ni. Pakistan-a health professional 5,000 chuang zingah doctor 3,000 leh nurse 600 te chuan Covid-19 hri an kai tawh a ni. Nimin thleng khan Pakis­tan-a Covid-19 hri kai hi mi 2,31,818 an awm a, heng zinga mi 1,31,649 chu enkawl dam tawh niin, he hri vanga thi hi mi 4,762 an awm tawh a ni.

Khawvel pumah Covid-19 kai chu nimin thleng khan mi 1,15,80,092 an tling tawh. Hri kai zingah mi 5,37,178 in an thihpui tawh a, enkawl dam mi 65,47,935 an awm tawh bawk. 

Hri kai enkawl mek zinga 99% chu ngaihtuahawm lo an ni a, hetihlai hian mi 58,655 (1%) te erawh chuan an dinhmun a ṭha lo nia sawi an ni thung. US-ah hri kai 29,83,142 awm tawhin mi 1,32,571 in an thihpui tawh a, hri kai leh hri vanga thi tamna ber ram an ni chhunzawm zel. US dawtah hian Brazil, India, Russia, Peru, Spain, Chile, UK, Mexico leh Italy-te chu hri kai tam zualna ram an la ni.