Myanmar tualchhung buaina vangin mi 1,500 chuang thi tawh Mi 8,000 chuang hren mek an la ni : UN

Myanmar rama civil sorkar paihthlaa sipaite'n thuneihna an chan aṭanga kum khat chhungin, sipai rorelna duh lohna vanga tualchhung buaina chhuakah mi 1,500 chuang an thi tawh niin United Nations chuan a sawi.

UN human rights thupuangtu Ravina Shamdasani chuan, nikum February 1-a sipaiten thuneihna an chan aṭang khan dan dik lo taka man mi 11,787 an awm tawh bawk a, an zinga mi 8,792 te chu tunah hian hren mek an la nih thu a tarlang.

UN human right office chuan sipaite kut tuara thi mi 1,500 chuang nia sawi bakah hian, buaina chhuak hrang hrangah mi sang tel an thih a rinawm thu a sawi bawk a ni.

Hetih lai hian Myanmar-a rorellai sipai sorkar chuan UN-in thi zat an puanzar chu a dik tawk loh thu an sawi ve thung.

Shamdasani chuan Geneva-a U.N. briefing-naah sipaite'n an thuneihna hmanga an hren mekte chungchang hi sawiin, "Sipai dodaltu aiawhin ka rawn ṭawng chhuak a, tharum thawhna tel loa lungawi lohna lantir emaw online kaltlanga an vuivaina lantirtute emaw tana auchhuak ka ni." a ti.

"Mipui 1,500 vel thi angin kan chhinchhiah a, hei hi lungawi lohna lantirtu te zinga mi chauh an la ni," tiin sipai an mi hreng zinga an nghaisak hlum mi 200 pawh an chhiar tel thu a sawi. "Mitthi 1,500 te zingah hian sipaite nena inbeihnaa thi te kan la chhiar lo a, mi sang chuang an ni tih erawh kan hria," tiin Shamdasani chuan a sawi.