Sept 2021 hnua a ṭum khatna atan mipui hmuhah Kim Jong Un nupui a inlan

North Korea hotu Kim Jong Un-a nupui, Ri Sol Ju chuan thla nga vel zet mipui hmaa a inlan loh hnuah nimin khan vantlang hmuhah a inlan leh. Kim Jong Un-te chhungkua hi coronavirus hripui len chhungin mipui hmaah an inlan khat hle a ni.

Kim leh Ri-te hian an khawpui Pyongyang-a Lunar New Year lawmna pualin, Mansudae Art Theatre-ah art performance neih an en niin KCNA news agency chuan an tarlang.

Ri hi nikum September 9 khan vantlang hmuhah a inlan a, hemi ṭum hian a pasal nen Kim-a pu leh a pa ruang an zalhna, Kumsusan Palace of the Sun chu an ram din champha pualin an tlawh a ni. Ri hian Kim chu social, business leh military outing-ah a ṭawiawm ṭhin avangin khawvel ramdangte ngaihven a hlawh tawh hle a ni. Kim Jong Un-a pa Kim Jong Il erawh kha chu a nupuite nen vantlang hmuhah an inlan khat hle thung a ni.

State media hmaah kum khat chuang a inlan tawh loh hnuah, Ri hi nikum February thla khan concert naah hmuh leh a ni a, mi tam tak chuan a hriselna dinhmun ṭhat tawk loh vang leh nau a pai vang nia sawite an awm.

South Korea-a National Intelligence Service chuan Ri hian Covid-19 laka an him theihnan pawn lama chhuah tam a duh loh thu sawiin, a fate nen hlim taka an inkawm theih phah thu lawmaker-te a lo hrilh tawh a ni. Hetih lai hian North Korea hian an rama Covid-19 hri leng chungchang engmah a la sawichiang lo a,mahse ramri te kharin an rama lut turte tan khuahkhirhna khauh tak a siam a ni.

Kim leh Ri-te hian fa eng zat nge an neih chiang taka hriatna a awm lo a, spy agency chuan fa pathum an nei niin a ngai a, mahse an fate chungchang pawh hi mipuite lamin an hrechiang lo hle.