US school 2-a inkahna thlengah mi 3 an thi

United States-ah Thawhlehni khan Virginia state-a college-a inkahna thlengah Campus police officer pahnih chu kahhlum an ni a, hemi ni vek hian Minnesota-a school-a inkahna thlengah zirlai pakhat kahhlum niin pakhat kah hliam a ni bawk.

Virginia state police-te chuan Brigdewater College-ah an ram huna Thawhlehni chawhnu khan inkahna hi thlengin, campus law enforcement officer leh campus safety officer-te a kahhlum hnuah pawikhawihtu hi a tlanchhe zui niin an sawi. Law enforcement agency-te chu campus-a thil thleng report an dawn veleh kal nghalin, pawikhawihtu nia rin, kum 27 mi Alexander Wyatt Campbell pawh a hnu lawkah man nghal a ni tih an sawi. Campbell hian silaia kahna hliam, na lutuk lo a tuar nia sawi a ni a, hei hi police-te kahna a ni nge amah a inkap tih sawichian a ni lo. Police-te hian tualthah thubuai an siamsak nghal a ni.

Bridgewater khua hi US khawpui Washington aṭanga darkar hnih leh a chanve kal niin, chawhnu 1:30 vel khan silai keng a awm tih chungchangah ralkhel dar an vaw tawh tih tualchhung media te chuan an tarlang. School hian tlai dar 4:30 khan an website kaltlangin inthiar fihlim vek tura ngenna, all-clear notice an tarlang bawk.

College zirlai pakhat, kum 21 mi Kasey Truslow chuan classroom building aṭangin silai hmehpuah ri a hriat thu Washington Post a hrilh. "Silai vawi hnih hmehpuah a nih khan, chhuatah kan bawk nghal a. Chhuatah khan darkar khat chuang kan awm a ni," a ti.

Virginia governor Glen Youngkin chuan, "Bridgewater College-a thil thleng chungchang pawh chiang takin hrilh ka ni. Silai hmetpuaktu hi tan inah khung ni tawhin, state leh local police te chuan pawikhawihna thlen dan hi an chhui chiang mek a ni," tiin a sawi.

Officer pahnih kahhlumte hi John Painter leh J.J. Jefferson an nih thu school chuan a tarlang. An pahnih hian "campus chhunga awmte min venhim an tum laiin kahhlum an ni ta a ni" tiin college president David Bushman chuan an website kaltlangin thuchhuah a siam.

"Heng officer te hi ṭhian inhnai tak an ni a, kan zingah chuan 'dynamic duo' tiha hriat lar an ni. John chu J.J-a'n kumina nupui a neih khan ṭhianah a hmang hial a ni. Zirlai, hnathawk leh staff te'n an ngaina vek a ni. Kei leh kan zavai aiawhin, an chhungte leh laina hnaite kan tawrhpui takzet a ni," tiin a ziak.

"Bridgewater College-a pawikhawihna rapthlak tak thleng hian Bridgewater mipuite min ṭhawng takzet a ni. Ṭul loa inhliamna leh nunna hial chan an awm hian kan thinglung a tina takzet," tiin Bridgewater Mayor Ted Flory chuan a sawi.

Silai khuahkhirhna dan, Gun control law khauh zawk siam tura hun rei tak Congress nawr tawhtu US president Joe Biden chuan nunna chanta chhungte chu a nupui nen an ṭawngtaisak reng thu a sawi. "Law enforcement officer-te chunga silaia inkahna thleng hi a ngeiawm a, a rang thei ang berin tihtawp a ngai a ni," a ti.

Minnesota khuaa inkahna hi khawpui pawn mai, Richfield khuaah chhun laiin a thleng tih official te chuan sawiin, zirlai naupang pakhat chu kahhlum niin pakhatin hliam a tuar. Pawikhawihtute hian South Education Center pawna zirlai, kawngsira kalte chu silai hian kapin car-in an tlanchhe zui nghal tih Richfield Police chief Jay Henthorne chuan a sawi. A hnuah rinhlelh thilah mi pahnih man an ni tawh.

Misual kut tuara zirlai thi hi Jamari Rice, tualchhung journalist ṭhenkhatte chuan Black Lives Matter activist Cortez Rice fapa a nih thu a sawi. Cortez Rice hi nikum April thlaa mihang thahtu nia puh, police officer hlui Kim Potter thubuai ngaihtuahtu judge vauah puhin man a lo ni tawh a ni.