Hri leng hmasa ang bawkin Omicron subvariant BA.2 hlauhawm : WHO
Khawvel huapa hri leng inkaichhawn awl tak Omicron subvariant BA.2 chu Covid-19 hri leng hmasa ang bawka hlauhawm a ni tih World Health Organisation (WHO) chuan Thawhlehni khan a sawi.
Hri thar BA.2 Omicron coronavirus variant hi hri leng hmasa zawk, BA.1 pianhmang aiin a hlauhawmna a nep bik chuang lo tih WHO official chuan a sawi a ni.
WHO chuan Thawhlehni vek khan ram ṭhenkhat, Covid inkaihhruaina thlahdul/tinep zawnga hma la te chu ram tam zawkah Omicron-in a peak a la thlen loh avangin khuahkhirhna khauh zawk kalpui chhunzawm zel turin a chah. WHO Director-general Tedros Adhanom Ghebreyesus chuan "Eng ram pawhin tlawm zawk emaw hnehna changtu zawk emaw tia inchhal nan chuan a la hma mah mah. He hri hi a hlauhawm a, kan mit hmuhah hian a la inthlak danglam zel a nih hi. WHO chuan Omicron variant sub-lineage pali leh BA.2 chu a zirchiang mek zel a ni," a ti.
WHO technical lead for Covid-19, Maria Van Kerkhove chuan,"Hriin taksaa nghawng a neih danah danglamna a awm tih finfiahna kan nei lo. Kan sawi tawh angin, Omicron hi inkaichhawn a awlsam zawk a, ṭhan zel theihna a ngah zawk bakah Delta aiin natna a thlen theihna a nep zawk bawk. Mahse hri leng hlauhawm tak zawng a la ni reng a ni." tiin fimkhur zel a pawimawh thu a sawi.
Omicron BA.2 version hian hri leng tlanglawn zawk, Denmark rama an hmuhchhuah BA.1 version chu a thlak mek a ni. Omicron lineage pahnih BA.1 leh BA.2 te inkarah hian vawi 40 hri inthlak danglamna, mutation a thleng hman. BA.2 hi nikum December thla khan South Africa-ah hmuhchhuah a ni. BA.2 hi natna tlanglawn leh hmuhchhuah tamzawk BA.1 aiin inkaichhawn a awlsam zawk a, vaccine la lote'n an kai awlsam zawk tih Danish study chuan December leh January inkara Denmark mipui 8,500 an zirchianna aṭangin an tarlang a ni.
Omicron subvariant hi ram 57-ah hmuhchhuah a ni tawh tih WHO chuan sawiin, vaccine, mask leh social distancing chu hri leng dona kawnga hmanraw ṭangkai tak a la nih reng thu an sawi.