Israel-in missile lo danna turin laser wall siam tum

Israel chuan Iron Dome missile defence system a neih tawh bakah, missile lo danna tur 'laser wall' siam leh a tum.

Defence official-te chuan unmaned aircraft lo danna tur, laser defence systems chu aircraft aṭangin hlawhtling taka enchhin a ni tawh tih an lo sawi tawh a ni.

Prime minister Naftali Bennett chuan missile interceptor atana an hman mek, Iron Dome defence system chu a man a toin a hautak hle tih a sawi a, hei vang hian rocket hmanga beih an nih ṭhin lo danna turin a hautak lo deuh zawk tur laser technology siam hna hi chak taka kalpui a nih thu a sawi. Kum khat chhungin an ram chhim lamah laser wall hi hman theih tum a ni, a ti.

PM Bennett chuan Gaza Strip aṭangin dollar za tel man lekin Israel lamah rocket kahchhuah a ni fo a, mahse Iron Dome system hmanga heng rocket lo kahthlakna atan hian dollar sang tel sen a ngai ṭhin thung tih a sawi. Hei vang hian dollar tlemte seng a, electrical pulse hmanga missile leh rocket lo man theihna siam hi ṭul thu a sawi a ni.

Laser wall technology hi eng ang tak nge a nih leh, a ṭangkai dan hi sawichian a la ni lo, mahse he system hi khawmual, boruak leh tuipuiah hman theih tura rin a ni. Israel sipaite chuan laser wall hi missile, rocket leh drone-ah a enchhin dawn a, he system hi Israel leh ram dang, Iran long range missile-in a kah phak chinte chuan an hmang thei dawn a ni.

Iron Dome missile defence system hi kum 10 liam ta khan Israel hian a hmang ṭan, sipaite chuan he system hi an fak hle. Gaza Strip-a firfiakte nena ṭum li an indo chhung khan Gaza atanga rocket kahchhuah zinga 90% chu he system hian lo kapthla thei niin an sawi.