Sri Lanka-ah School hawng ṭan

Covid-19 hri leng vangin ni 115 lai Sri Lanka-a school khar a nih hnuah nimin aṭang khan grade 5, 11 leh 13 zirlaite tana hawn leh a nih thu Ministry of Education chuan a tarlang.

Grade 12 leh 10 zirlaite hi July 20 aṭanga ṭan tura tih a ni a, grade 3,4,6,7,8 leh 9 zirlaite pawh July 27-ah school lut ṭan tura tih an ni. August 10-ah grade 1 leh 2 zirlaite school an lut thei dawn bawk a ni. Ministry of Education additional secretary Ranjith Chandrasekera chuan nu leh pate chu an fate dam lohna nei, khawsik, khuh leh hritlang an awm a nih chuan school luh hunah hian kal tir ve rih lo turin a ngen a, class room-ah chuan zirlaite hi hmaituamna hman tir an nih dawn loh thu leh school an kalna kawngah chauh hman tir an nih dawn thu a sawi bawk.

School ṭan hun tur hi sawi ni mah se, school leh a chheh velah hian Covid-19 health guideline chu khauh taka kalpui tum a ni a, school principal-te chu test emaw exam buatsaih rih lo tura hriattir an ni. Kar liam ta khan zirtirtu leh non-teaching staff-te chuan zirlai naupang an awm huna fimkhur taka hri laka invenna an lo kalpui dan tur school-ah an lo zir lawk a ni. Thla hlui aṭang khan Sri Lanka sorkar chuan hripui leng vanga curfew a puan chu a hlip a, a hlih chhan hi thla hnih dawn ram chhunga Covid-19 hri kai thar an awm tawh loh vang a ni. Ram pawn aṭanga hri kai awm belhsa tih loh chu April 30 aṭang khan ram chhungah hri kai thar an awm tawh lo nia hriat a ni bawk.