Cambodia-in ASEAN meeting-a tel turin Myanmar-a non-political aiawh a sawm

Cambodia foreign ministry chuan tun thlaa Southeast Asian foreign minister meeting neih turah, Myanmar sipai sorkarin foreign minister atana a ruat aiah non-political aiawh zawk chu tel tura sawm a ni, a ti.

ASEAN-in Myanmar ram tualchhung buaina tihtawp a nih theihna ruahmanna a siamte tihpuitlinna tura hmalakna leh hmasawnna a awm loh avangin, ASEAN member ramte chu meeting-a Myanmar foreign minister sawm chungchangah an inlungrual thei lo a ni.

Cambodia hi member ram10 awmna block-ah chair a ni meka, February 16 leh 17 hian ministerial meeting hi a thleng dawn a ni. Cambodia foreign ministry thupuangtu, Chum Sounry chuan , "Seat ruaka a awm ai chuan Myanmar chu politics-a inhnamhnawihna nei lo zingah palai rawn ruat turin kan ngen a ni," tiin a sawi.

Myanmar-a sipaite'n mipui sorkar paihtlaa thuneihna an hnehchhuh hnu khan tualchhung buaina a thleng chhunzawm reng a, buaina chhuakah hian mi 1,500 vel an thi tawh tih United Nations human rights office chuan a lo tarlang tawh bawk. Ramri hrulah pawh sipaite hi democracy thlawptu pawl leh hnam bil helpawl hrang hrangte nen an inbei reng bawk.

Cambodia chuan Nilaini khan Myanmar-a boruak inlumlehdan chu a ngaihṭhat thlak loh thu sawiin, tharum thawhna leh mihring dikna rahbeh a la ni chhunzawm zel chu pawi a tih thu a sawi. "ASEAN member ramte chuan tharum thawhna thleng chu rang taka tihtawp a ṭul thu te, Myanmar party hrang hrangte pawh inbengdai tura an duh thute an sawi a ni, " tiin a thuchhuahah a tarlang.

ASEAN hian nikum khan Myanmar ram chhunga boruak ṭha a awm theihna tura inremna an siampui chu sipai sorkar hian a zawm loh avangin ASEAN meeting-ah pawh Myanmar sipai hi an tel an lo remti tawh lo a ni.