Firfiakten Pakistan sipai hmun 2 an bei

Pakistan prime minister Imran Khan-a'n Winter Olympic Games hawnna inkhawm hmang tura Beijing a pan hma lawkin, Nilaini zan khan Balochistan province-a sipai hmunpui pahnih chu firfiakten an bei.

Baloch Liberation Army (BLF) chuan sipai hmun beitute an nih thu an sawi. Pakistan sipaite chuan firfiakte pawikhawihna thlenah hian sipai pakhat a thi a, firfiak zinga pali chu sipaiten an kaphlum niin an sawi. Hetih lai hian BLF chuan military base luhna bula motor aṭangin thihchilh bomb an tipuak a, sipai 50 chuang an thi niin a sawi thung.

Kar liam ta khan firfiakte chuan Gwadar lawng chawlh hmun bula post beiin, sipai 10 an lo that tawh bawk a ni. Baloch firfiakte hian gas project, infrasctructure leh security force-te an bei fo a, an rama China project siamte pawh beiin Chinese worker-te pawh an lo that fo tawh ṭhin. Gwadar port siamnaah hian China pawh a tel a, hei bakah Balochistan province-ah hian China-Pakistan Economic Corridor hnuaiah project dang pawh a siam a ni.

Pakistan sorkar chuan Balochistan-a firfiakte hi India-in a pui niin a puh a, mahse hei hi India chuan a pha thung.