US-in Russia ep turin sipai 3,000 tirchhuak

United States chuan Ukraine bula Russia sipaite an inkhuar hnuah Europe chhak lam ramten venhimna ṭha zawk an neih theih nan Poland leh Romania-ah US sipai 3,000 dawn a tir chhuak tih US official chuan a sawi.

US president Joe Biden chuan Europe khawchhak lama America sipai tirchhuak tura remtihna a pek hnuah Nilaini khan sipaite hi an chhuak nghal a ni. Pentagon chuan sipai an tirhchhuah hi US-in NATO hnuaia a thawhpui ramte venghim tura a inpeihzia lantirna a ni, a ti.

Russia chuan Ukraine run a tum nia puhna chu a la pha chhunzawm zel a, mahse Ukraine ramriah hian a sipai 10,000 chuang a dah tawh thung.

Pentagon chuan Vilscek, Gemany-a awm mek US Stryker squadron member 1,000 vel chu Romania-ah dah an ni dawn a, Fort Bragg, North Carolina-a 82nd Airborne Division service member 1,700 vel chu Poland-ah tirin, Fort Bragg aṭang hian service member 300 vel chu Germany-ah tirh an ni dawn bawk tih a sawi.

President Joe Biden chuan Russia president Vladimir Putin hnena a thu thlenah nghet taka a din chhunzawm tur thu sawiin, "Tharum thawh zawnga hma an lak chhung chu NATO ṭhiante leh Europe chhak lamte chu kan awm ve a ni tih hriattir kan tum a ni," tiin a sawi.

Russia deputy foreign minister Alexander Grushko chuan US chet dan hi inremna siam a tiharsa zawk dawn tih a sawi a, US-in sipai a tirchhuak chu boruak chhe zawk siamna tur, sipaite inepna boruak tisang zawk tur leh remna siamna tur kawng tiche tur a ni, a ti.

Hetih lai hian NATO secretary-general Jens Stoltenberg chuan US sipai tirh chhuah an ni chu lawmawm a tih thu a sawi thung a, NATO chuan a thawhpui ramte venghim turin a ṭul ang leh a tih theih ang ang a ti zel ang, tiin a sawi.