Coronavirus hi boruaka leng a ni Scientist rualten WHO hnenah lehkha thawn

Ram hrang hrang 32-a scientist 239-te chuan World Health Organisation (WHO) hnenah open letter thawnin, khawvel puma hripui leng mek Covid-19 chu boruaka leng a ni tih leh, a hri leng them tereuhte aṭang pawhin kai kaichhawn theih a ni tiin, hri leng chungchanga kaihhruaina a siamte chu ennawn turin an ngen. 

WHO hnena open letter an thawn hi a kimchangin hi scientific journal-ah tihchhuah an tum tih an sawi bawk. Hetih lai hian UN health agency chuan Covid-19 hi boruaka leng a ni lo tih leh, khuh leh hahchhiau khum aṭanga droplet per chu a inkaidarh dan ber a nih thu a lo sawi tawh a ni.WHO infection prevention and control hotu Dr Bendettta Allegranzi chuan coronavirus hi boruakah a leng tih finfiahna tur rintlak a awm lo niin a la sawi thung a, thla eng emaw zat chhung chu he hri hi boruakah a leng em tih pawh an lo buaipui fo tawh a, mahse a tihchianna tur engmah a awm lo a ni, a ti. Boruaka leng tih tur chuan droplet micron 5 aia te chinah zirchian phawt a ngai dawn niin a  sawi. 

Expert-te chuan WHO infection prevention and control committee chu a ngaihdan sawn duh lo leh, guideline siamthar lam pawh tichak duh loah an puh. An ngaihdan pawmpui burtu mi tlemte chu committee ngaihdan hnialtute hnial thlak tir tum ṭhinah an puh bawk. Virgnita Tech-a airborne transmission of virus expert, Linsey Marr chuan agency hian boruaka leng tih tak avang hian hri hi inkaidarh awlsam lutuk leh, boruakah pawh thui tak tak leng thei turah an ngaih tlat vangin an pawm thei lo niin a sawi.