Israel-in satellite thar kap chhuak

Israel chuan nimin khan spy satellite hlawhtling takin a kap chhuak tih a tarlang.

Israel Defense Ministry chuan thuchhuah an siamah hemi chungchang hi tarlangin an ramin an ram leh a chhehvela 'surveillance ability' hmasawnna a neihna turin spy satellite hi a kap chhuak tih an sawi. An satellite kah chhuah thar hi 'Ofek-16' tih a ni a, an ram huna zing karah central Israel-a satellite kah chhuahna hmun aṭangin 'Shavit' launcher hmangin an kap chhuak.

Defense Ministry chuan an satellite thar chuan khawvel a hel kual dawn tih leh data a rawn thawn reng dawn thu an tarlang. An engineer-te leh  Israel Aerospace Industry chuan an satellite-in hna a thawh ṭan tak tak hma hian Ofek-16 hnathawh theih dan chu ruahmanna siam lawkin uluk takin an enchhin lawksa vek tih an tarlang bawk.

Ofek-16 hi electro-optical surveillance satellite niin thiamna changkang tak hmanga thuam a ni a, Defence Ministry-a Space Administration kaihhruaina hnuaia an siam niin Israel chuan an chhehvel ramte aṭanga buaina awm thei tur 'information' dawnna atana an hman ṭangkai an beise hle. Space and Satellite Administration ministry hotupa Amnon Harari chuan,"Ofek-16 hian Middle East mai bakah a aia huam zau deuh aṭanga kan rama buaina thlen thei tur a lo enfiah dawn a ni," a ti.