Indonesia lirnghing vanga thi 832 an tling tawh

Indonesia rama kar kalta Zirtawpnia magnitude 7.5-a naa lir nghing vanga thi chu nimin thleng khan mi 832 an tling tawh.

Magnitude 7.5-a naa lir nghing hian in tam tak a sawichhiat bakah, tuifawn pawh metre ruk (feet 20) a sangin a fawn zui a ni. Lirnghin ṭanna hi central Sulawesi-a Dongngala khua aṭanga hmarchhak lam km 56 vela hla, lei hnuia km 10-a thuk aṭang nghing ṭan a ni.

Kumin July leh August thla khan Sulawesi chhimthlang lama Lombio thliarkara lirnghing vangin mi 500 dawn an lo thi tawh bawk.

Zirtawpnia lirnghing vang hian in leh lei te a chhe nasa hle a, in chimin a delhte chhanchhuah hna hi sipaite leh disaster management agency-ten an thawk nghal a ni. National disaster management agency thupuangtu Sutopo Purwo Nugroho chuan lirnghing tuar an chhanchhuah te hian ei tur, naute chaw, damdawi, awm lailawkna tur puanin leh puanthuahte an mamawh tih a sawi. Hei bakah hian chhanchhuah hna thawktute chuan khawl lian leh ṭha an mamawh tih a sawi bawk.

Indonesia President Joko Widodo chuan national disaster management agency, national police chief, military commander leh ministry dang hotute chu lirnghing tuarte chhawmdawlna hna rang taka thawk nghal turin a ti. President hian nimin khan lirnghinna hmun hi a tlawh bawk a ni.