Trump leh Saudi lal-in oil supply chungchang sawidun

US President Donald Trump chuan Saudi Arabia lal King Salman chu kar kalta Inrinni khan biain, oil suppy chungchang a sawipui niin Saudi state news agency SPA chuan a sawi.

Hemi hma hian US President hian oil man sang chungchangah 'Organization Of Petroleum Exporting Countries' (OPEC) hi a lo sawisel tawh a, oil thawnchhuaktu ramte chu kumin November thla laihawla US congress member mid-term election neih hmaa oil market lam boruak ṭha siam tura crude oil pekchhuak tipung turin a lo ngen tawh bawk.

Saudi Arabia hi khawvela oil thawnchhuaktu lian ber niin, OPEC hruaitu nilai a ni.

Kar hmasa New York-a UN General Assembly-a thu a sawiah, President Trump chuan OPEC member-te chuan a hma ang bawkin ramdangte chu an bum leh ta niin a sawi a, hei hi a duh lo hle a, midang pawhin an duh lo a ni, a ti. "Heng ramte hi engmah phut let loin kan lo venghim tawh a, mahse anni chuan remchanga hmangin man to takin oil min leitir ta zawk a ni. Oil man an tihsan hi titawp a, a man tihniam tawh turin kan phut a ni", a ti.