Egypt-in thu dik lo thendarhtu hrem

Egypt court chuan human rights activist Amal Fathy chu thu dik lo, fake news a thehdarh avangin kum hnih tang tur leh pawisa chawi turin a hrem.

Amal Fathy-i hi kumin May thla khan sorkar sawiselna video a post avangin man a lo ni tawh a ni. He video-ah hian Fathy-i chuan bank a tlawh laia mipat hmeichhiat lam hawia mawi lo taka an ṭawngkhum dan chungchang a sawi a, Egypt sorkar chu hmeichhiate venhimna tura hna thawk ṭha tawk loah a puh bawk.

Amnesty International chuan court rorel dan hi sawiselin, rorel dan dik lo a ni, a ti.

Egypt hian tunhnaiah an rama internet khuahkhirh theihna tur dan a pass a, hei hi rights activist-te chuan an sawisel nasa hle. He dan siam hnuaiah hian Egypt security leh economy tana him tawk lo nia hriat chungchang tarlanna website-te chu block sak theih an ni ang. Hei bakah hian social media account-a follower 5,000 chuang nei chinte chu enfiah sak theih an ni dawn bawk. Thuneitute chuan he dan hi an rama firfiaka chetna thleng ṭhin leh tualchhung buaina thleng ṭhin venna atana pawimawh niin an sawi.

Court chuan Amal Fathy-i hi Egyption pound 10,000 (dollar 560) chawi turin a ti bawk. Mahse Fathy-i ukil chuan court thutlukna siam hi rorelna sang zawkah an khing let dawn tih a sawi.