Syria-in Nasib Border Crossing hawng dawn

Syrian Ministry of Transportation chuan Jordan nena ramri-a an inkalpawhna, Nasib Border Crossing chu October 10-ah hawn a ni dawn tih a sawi.

Ministry thuchhuah chuan he border crossing kaltlang hian Syria aṭanga truck leh bungraw phur dang luh leh chhuah phalsak a ni dawn a ni, a ti. Nasib Border Crossing hi kum 2015-a helhoin Nasib area leh, Syria chhim lama Daraa Province-a crossing an lak hnu khan khar a ni.

Syria sipaite chuan July thla khan Daaraa leh border crossing hi hel kut aṭangin ala let a, helho hi sipaite hnenah inpein Syria hmarlama an ram lak aṭanga insawnchhuah pawh an remti tawh a ni.

Kar hmasa khan Transportation Ministry chuan border crossing kaltlanga Syria rama lut leh chhuak truck-te hnen ṭanga fee lak ṭhin chu tihsan a nih tur thu a puang tawh bawk. Nasib crossing hi Damascus-Amman international highway a awm a nih avangin Syria rama border crossing lun ber a ni ṭhin. Syria-in Jordan leh Gulf ram dang bungrua a thawnchhuahna atana a kawng hman ber a nih avangin Middle East-ah pawh land crossing pawimawh ber zinga ngaih a ni.