Britain Queen Elizabeth-II kum 70 a lal tling ta

Britain lalnu, Queen Elizabeth II chu nimin kha lal a nih champha vawi 70 a ni a, British lal ni tawh zingah lal rei ber a ni.

Kum 95 mi, Elizabeth II hi February 6, 1952-a a pa, King George VI a thih hnu khan kum 25 mi chauh a nih laiin Britain bakah ram dang 10 chuangah lal atan dah zui a ni. A pa thih lai hian international tour-in Kenya-a a zin lai a ni.

A lal kum 70 tlin lawmna hi Inrinni liam ta khan England khawchhak lama Sandringham-a a inah nei ṭanin, tualchhung mite a sawm a ni. Cake an siamsak chu a zai nghal bawk.

Kum 90 a tlin hnuah Elizabeth hian lal a nih avanga a duty-te ṭha takin a la ti thei zel a, mahse nikum Ocotber thla khan damdawi-inah enkawl a ni a, hei vang hian doctor-ten chawl hahdam tura an tih angin tun hnaiah mipui hmuhah a inlan khat ta deuh a ni.

June thla tir lamah Queen Elizabeth II lal kum 70 lawmna hi pui tham takin ni li chhung neih tum a ni. Ram pum huapin 'Big Jubilee Lunch' leh 'Platinum Pudding Competition' te siam tum a ni a, military parade leh music concert-te buatsaih a ni ang.

Prince Charles-a nupui 'Queen Consort' tih a duh
Queen Elizabeth II chuan a fapa, a lalṭhuthleng rochuntu tur, Prince Charles-a nupui Camilla chu a fapa-in lalna a chan hunah 'Queen Consort' tia koh a duh thu a puang.

Camilla hi Prince Charles leh a nupui hlui, Princess Diana inṭhenna chhanah puhin a tirah Britain mipuite huat pawh a hlawh hle a, mahse tunah erawh chuan mipui lam pawhin an pawm ve tawh a ni.

A lal kum 70-na thlen hma ni, Inrinni liam taa ram mipuite hnena thuchah a tihchhuahah, Queen chuan British mipuite chuan amah an thlawp ṭhat ang bawkin, Prince Charles leh Camilla chu an thlawp chhoh zel a beisei thu a sawi.