US-ah Covid-19 vanga thi nuai 9 chuang tawh

United States chuan mel lung duhawm lo tak siamin, kar liamta Zirtawpni khan coronavirus vanga thi mi nuai kua chuang an awm tawh tih Johns Hopkins University chuan a tarlang. Rampum huapa Covid-19 hri kai hi maktaduai 76.2 chuang an awm tawh bawk a ni.

US state zingah California chu Covid-19 vanga thi tam berna niin, thihpui mi 80,798 an awm. Thihpui 80,459 awmna Texas chuan a dawt a, thihpui 65,578 awmna Florida leh mi 65,578 ten an thihpuina New York te'n an dawt tih data chuan a puang. Pennsylvania, Ohio, Illinois, Georgia, Michigan leh New Jersey state-ah hripui vanga thi hi 30,000 chuang an awm bawk.

US hi khawvela Covid-19 hri kai hmuhchhuah leh thihpui tam berna ram a la nih chhunzawm zel a, khawvela hri kai tawh zat aṭanga 20% dawn leh thihpui 15% chuangte chu US ami te an ni.

Nikum February 22 khan US-ah Covid-19 vanga thi hi mi nuai nga an tling chho a, June 15-ah nuai ruk, October 1-ah nuai sarih leh December 14-ah nuai riat an tling chho hman.

Hripui vanga thi hi mi nuai nga aṭanga nuai ruk tling turin ni 113 chhung hun an hmang a, nuai ruk aṭanga nuai sarih tling turin ni 108, nuai sarih aṭanga nuai riat tling turin ni 74 leh nuai riat aṭanga nuai kua tling turin ni 52 hun an hmang a ni.