Kim-an SKorea president hnenah uite pahnih pe

North Korea ram hotu Kim Jong-un chuan South Korea President Moon Jae-in chu thilpek a thawn.

Kim-an South Korea president hnena thilpek a thawn hi uite, Pungsan dog var pahnih a ni a, uite dahna hi demilitarized zone (DMZ) kaltlang puiin Ningani khan South Korea-Panmunjon khua thlenpui a ni. He thilpek hian ram pahnihte inkar boruak ṭha chho zel a lantir a ni.

Moon leh Kim hian September thla laihawl khan NKorea khawpui, Pyongyang-ah meeting neiin, hei hi kumin chhunga meeting an neih ṭum thumna a ni. Hemi ṭuma meeting an neihnaah hian Kim chuan uite pek a tum thu pawh a sawichhuak niin SKorea presidential Blue House chuan a tarlang.

SKorea president hnena uite a pek hi North Korea county hming chawia phuah a ni a, ui rinawm leh ramvahnaa atan pawh thiam thil nei ṭha tak a ni. Hetiang uite, Pungsan breed hi North Korea rama ransa ngaihlut tak a ni.

President Moon hi ransa ngaina tak a ni a, nikum July thla khan ui dum, mixed breed Tori chu lain a vulh a, SKorea president chenna ina ui vulh hmasak ber a ni. Tuna NKorea president hnen aṭanga ui pahnih a dawn nen a vulh ho dawn ta a ni.

Kum 2000 khan Kim Jong-un-a pa, Kim Jong Il chuan hetih laia South Korea president Kim Dae-jung nen inter-Korean summit an neih ṭumin Pungsan dogs pahnih chu thilpekah a lo pe tawh bawk.

Korea ram pahnihte hian an inkar boruak siamṭhat tumin hma an la zel a, nimin aṭang khan ramri bula chilpuah bomb an phumte pawh an lachhuak niin South defence ministry chuan a tarlang. Ram pahnih hruaituten summit an neihah khan Panmunjon-a Joint Security Area (JSA) a chilpuah bomb an phumte chu ni 20 chhunga paihbo leh vek an tiam a ni. South Korea ram chinah chuan military engineer-ten he hna hi an thawk a, North Korea lamah tuten nge thawk tih erawh sawichian a ni lo. Inremna an siamah hian JSA-a guard post siam tihtawpte pawh a tel.

JSA hi km 250-a thui demilitarised zone (DMZ)-a ram pahnih sipaite inhmachhawnna lai hmun a ni a, UN sipaite pawh dah an ni bawk.