Maldive President hlui bail-in chhuah tir

Maldive president hlui Maumoon Abdul Gayoom chu Pathianni khan bial-a chhuah tir a ni.

Kum 80 mi Gayoom leh a fapa legislator Faris Maumoon-te chu Male-a High Court chuan bail hian a chhuahtir a ni. Maumoon chuan politics vanga man midangte pawh chhuah vek an nih thuai a beisei thu a sawi.

September 23-a Maldive President thlanna neih taka hnehna changtu, Ibrahim Mohamed Solih chuan thlan tlin a nih hnu hian president ṭanglai Abdulla Yameen hnenah politics thil avanga mante chu chhuah zalen vek turin a ngen.

President hlui Gayoom hian kum 30 chhung Maldive-ah hian ro relin, kum 2008 inthlanah khan a chak zo ta lo a ni. Mahse Yameen hi thlawpin kum 2013-a inthlanah an chak a, mahse thawkdun chhunzawm thei loin politics lamah an inhmelma zui ta a ni. Kumin February thla khan Yameen-a paihthlak tuma puhin Chief Justice leh Supreme Court judge-te nen man an ni a, hemi hnu hian Yameen chuan amah paihthlak tuma hmalakna dan nan ni 45 chhung atan state of emergency a puang zui nghal a ni.

President Yameen-a rorelna hnuaiah hian eptu hruaitu pawimawhte bakah rorellai party zingah pawh president laka hel nia sawite chu jail-ah tan tir leh, ram danga tlanchhiat ngai khawpa siamte an ni. A term hi November 17 hian a tawp dawn a, Solih chu Maldive president thar atan lakluh a ni tawh dawn a ni.