Indonesia-a Sumba thliarkarah lir a nghing

Indonesia-a Sumba thliarkarah nimin zing khan vawi hnih lir a nghing. Kar hmasa Zirtawpni khan Sumba aṭanga km 1,600-a hla, Sulaweisi thliarkar chhim lamah na takin lir a lo nghing tawh bawk a, chhiatna thleng vanga thi hi mi 1,234 an tling tawh a ni.

Nimin zing khan Sumba-ah hian magnitude 5.9-a nain lir a nghing a, a hnu minute 15 velah magnitude 6.0-a nain a nghing nawn leh a ni. Mi tam tak chu hlauin pawnlamah an tlanchhuak a, chhiatna liantham thleng erawh hriat a la ni lo.

Sulaweisi thliarkara lirnghing tuarte chhanchhuah leh chhawmdawl hna thawh chhunzawm mek a la ni a, United Nations Office for the Coordination of Humanitarian Affairs (UNOCHA) chuan mi 191,000 chu chhawmdawl ngaiin an awm mek tih a sawi. Lirnghinna biala chengte hian ei tur, tui thianghlim leh awm lailawkna tur te an mamawh hle tih a sawi.

Zirtawpnia lirnghing hi Sulaweisi province khawpui, Palu chuan a tuar nasa ber a, lirnghing hian tuifawn sang tak a siam tel avangin tuipui kama chengten an tuar nasa hle a ni. Lirnghing hian leimin nasa tak a siam bawk a, Indonesia Red Cross team chuan leichimin a hnawl ruang 34 chu nimin khan an hmuhbelh a, hei bakah hian Sigi Biromaru district-a Jonooge Church Training Centre-a Bible camp nei lai zirlai 86 te chu an chin hriat lohin an la awm bawk.