Maldives president-in inthlan hmain dollar mtd 1.5 a dawng

Maldives President Abdulla Yameen chu an ram president thlanna neih hma lawk khan dollar maktaduai 1.5 a pek a ni niin anti-money laundering body chuan police-te an hriattir. Heng pawisate hi a bank account-ah thunsak a ni tih a sawi.

Eiruknaa inhnamhnawih leh a thuneihna dik lo taka hmanga puh, President Yameen hian September 23-a inthlan neihah khan eptu pawl candidate a hneh zo lo a ni.

Inthlan hmaa President hnena pawisa pek hi Maldives Islamic Bank-a a private bank account-ah ṭum hnih thunsak a nih tih police-te hi hriattir an ni. Maldives central bank hnuaia agency, Financial Intelligence Unit (FIU) document-a a lan danin, president account-ah hian September 5 khan pawisa faiin dollar 648,508 thun a ni a, a hnu September 10-ah account ngaiah bawk hian dollar 810,635 thun leh a ni. Heng pawisate hi a hnuah lakchhuah vek a ni bawk.

Legal expert-te chuan president account-a sum tam tam tak thunsak a nihna chhan hi ngaihven a ngai niin an sawi. Hetianga sum tam tham ram hruaitu lu ber private account-a thun a nih chuan, police-te chuan an enfiah ngei a ngai dawn tih an sawi. Bank lam hi zawhfiah a nih chuan private company-te donation pek a ni tih an sawi a, president inthlanna neih tura atana a hman tura an pek niin an sawi. Hetihlai hian president thupuangtu, Ibrahim Muaz Ali chuan an puhna hi thu dik lo niin a sawi a, president chuan dan kalhin eng thil mah a ti ngai lo a ni, a ti. November 17-a a term tawp tur, President Yameen hi law enforcement agency-te zawhna chhang turin a inpeih reng a ni, a ti.