Iran-in ballistic missile-in Syria kap

Iran Revolutionary Guard chuan Thawhṭanni khan Syria chhim lam chu ballistic missile hmangin a kap tih a sawi a, an rama military parade neih laia beitu helte an beih letna a ni tih a sawi.

Iran hian kum khat chuang chhunga missile hmanga Syria a beih ṭum hnihna a ni. Iran state television leh sorkar enkawl IRNA news agency chuan an missile hmanga an beihnaah hian Syria-a helte chu thi leh hliam eng emaw zat an awm niin a sawi. Hetihlai hian he thil thleng chungchang hi Syria state media lam chuan engmah an la sawilang lo.

Revolutionary Guard-ten thlalak an tihchhuahah, missile hi Iran khawthlang lam, Kermanshah khua aṭang kahchhuah an ni. Missile pakhah hian 'Death to America, Death to Israel, Death to Al Saud' tih an inziak a, Al-Saud hi Saudi Arabia roreltu chhungkua an sawina a ni.