Canada-in Suu Kyi-i chawimawina pek hlihsak

Canada Parliament chuan Myanmar ram hruaitu, Aung San Suu Kyi-i hnenah an ram chawimawina, Canadian Citizenship a lo pek tawh chu a hlihsak. Hei hi Myanmar rama Rohingya Muslim-te beih an nih chungchanga mipuite tawrhna dem zawnga a ṭawngchhuah duh loh vang leh, sipaite chet dan a thlawp vang niin an sawi.

House of Common chuan kar hmasa khan Suu Kyi-i chungchang hi ngaihtuahin, chawimawina an lo hlan tawh chu hlihsak an rel a, hemi hnuah Senate chuan ngaihtuah ve lehin, kum 2007-a Canadian citizenship an lo hlan tawh chu hlihsak an remti leh a ni. Senate-in a remtih hnuah Thawhlehni khan Parliament chuan Suu Kyi-i hnenah chawimawna an lo hlan tawh chu a hlihsak ta a ni. Suu Kyi-i hi Canadian citizenship chawimawhna hlan tawh zingah hlihsak leh hmasa ber a ni.

United Nations fact-finding mission-in thla hmasaa report a tihchhuahah Myanmar sipaite chuan ruahmanna siamsa vekin Rohingya civil mi sang tel an that a, an khuate halsakin hmeichhiate an pawngsual bawk niin a sawi. Sipai hotute chu he thil thlengah hian chhui chiang a, mipuite an suat avanga thubuai siamsak turin a ti a ni.

Suu Kyi-i hi kum 1991 khan sipai rorelna hnuaia awm, Myanmar rama democracy tundin a nih theihna tura a beihna avangin khawvel chawimawina sang, Nobel Peace Prize hlan a lo ni tawh bawk.

Senator Ratna Omidvar chuan Suu Kyi-i chawimawina an hlan lai chuan Myanmar ram dinhmun siamṭhatna tur leh human rights tana beitu mi ropui tak a ni tih a sawi. "Khawvelin a lakah beiseina sang tak neiin, Myanmar ramah democracy tundin a nih a, boruak muanawm tak hnuaiah an awm chhoh beiseinain an thlir a, mahse chutiang chu a ni ta si lo a ni", a ti.

Omidvar chuan Rohingya hnam laka sipaite chetdan rawng tak chu Suu Kyi-i chuan a pha tlat a, international investigator leh journalist-ten chhui chian an tumna a khuahkhirh tlat a, sipaite thlavang hauhin, Rohingya mite chhawmdawlna pek tur pawh an dansak a ni, a ti. Hetianga thiltih hi Canada leh khawvelin a pawmpui thei lo tih an lantir a ngai niin a sawi.