Paris-a bomb tihpuah tumnaa inrawlhah Iran puh

France official-te chuan kumin June thlaa Paris-a Iran eptu pawlten rally an huaihawtnaa bomb tihpuah tumnaah khan Iran ministry of intelligence a inrawlh niin an sawi.

Thuchhuah siamin France sorkar chuan he thil kaihhnawihah hian Iran senior official pahnihte thil neih chu khawih chet theih loha an hreksak thu a sawi. Iran chuan an puhna hi hi thu dik lo, phuahchawp niin a sawi thung.

June 30 khan Iran eptu pawl thlawptute chu Paris-a National Council of Resistance of Iran (NCRI) meeting neiin an pungkhawm a, an zingah hian US politician, House speaker hlui Newt Gingrich, leh President Donald Trump-a lawyer Rudy Giuliani pawh an tel. NCRI hi Iran-in dan pawna a hnawl leh firfiak pawla a puan, Mujahideen-e-Khalq (MEK) political wing a ni.

Meeting neihna hmuna bomb tihpuah tuma puh, Belgium mi pahnih leh Iran mi pakhat chu man an ni a, an kut aṭang hian bomb leh a tihpuahna hmanruate man a ni bawk. He thil thleng avanga hmun dang an dapnaah an thurualpui nia puh Merhad A tih chu Paris-ah man a ni leh bawk. Germany-ah police-ten Austria-a Iran diplomat Assadollah Assadi an man bawk a, German prosecutor te chuan Assadi hi intelligence agent niin, Paris-a meeting neihnaa pawikhawihna thleng tur hian thu a pek bakah bomb te pawh hi a pe niin an sawi.

France sorkar chuan Paris-a meeting beih tumnaah hian Iran intelligence ministry chu a inrawlh ngei nia a ngaih thu Thawhlehni khan a sawi.