Indonesia-ah tlang kang invawrh chhuak

Indonesia ramah lirnghing vanga chhiatna nasa tak a thlen hnu lawkah Mount Soputan-ah nimin khan tlang kang nasa takin a invawrhchhuak a, metre 4,000 vela sangah vut sa te a vawrh chhuak a ni.

Thuneitute chuan North Sulawesi province-a Mount Soputan bulṭhula km 4 biala chengte chu insawnchhuak turin an hriattir nghal a, tlang kang ṭanga tui sa lo tawlh chhuah a hlauhthawnawm niin National Disaster Mitigation Agency chuan a tarlang.

Nimina tlang kang invawrh chhuahna hmun hi kar hmasaa magnitude 7.4-a na lirnghing leh, lirnghingin tsunami a thlenna hmun, central Sulaweisi aṭanga km 900 vela hlaa awm a ni. Lirnghing leh tsunami-in chhiatna an thlena thi hi mi 1,234 an tling tawh a, mi 60,000 chuang an insawnchhuak bawk.

President Joko Widodo chuan nimin khan a ṭum hnihna atan Sulaweisi-a lir nghinna hmun hi a tlawh leh a, linghing tuarte chhanchhuah leh chhawmdawl hna thawh dante a enpui. In chim hnuaia tangte lakchhuah kim an la ni lo a, hei vang hian thi zat pawh hi an la punchhoh tur thu chhanchhuah hna thawktute chuan an sawi.