Canada khawpui Ottawa-ah State of emergency puang

Canada khawpui Ottawa-a truck khalhtute'n kar khat chuang Covid-19 khuahkhirhna chungchanga lungawi lohna an lantir avangin Mayor Jim Watson chuan state of emergency a puang.

Mayor chuan nawrh huaihawttute hi an pung zel a, police-te aia an tam chhoh tawh avangin thunun hleih theih lohin an awm tawh a ni tiin, Pathianni khan state of emergency a puang a ni. Nawrh huaihawt hian khawpuia chengte himna pawh a tiderthawng thei tawh niin a sawi.

Truck khalhtute hi Ottowa khawpui chûan hnuai lamah inhawrkhawmin, puan-in te an kaih a, kawngpuite kaltlang theih lohin an dang a ni.

Canada sorkarin truck khalhtute, a bikin ramri kaltlang ngaite chu Covid vaccine dose kima la vek tura thupek a tihchhuah avangin he lungawi lohna hi lantir a ni a, 'Freedom Convoy' tia vuahin an ram hmun hrang hrang aṭangin nawrh huaihawtna tel tur hian an kalkhawm a, January 29 aṭang khan lungawi lohna hi an lantir ṭan a ni.

Mayor hian nawrh huaihawtte hian khawpui nunphung an tihbuai tawh avangin thuneitu sang zawk leh sorkara mi pawimawhte inrawlh leh an puihna an mamawh thu a sawi. Truck khalhtute chu midangte dinhmun ngaihtuah pui loah puhin, an nawrh huaihawtna hmunah chuan an motor horn leh siren ti riin, halmawite an hal a, party neihna hmun ang maiah an chhuah niin a sawi.

Khawpuia chengte pawhin truck khalhtuten motor horn an hmeh rik reng te, indiriamna ṭawngkam an chhakchhuak leh kawngpui an dangte chu thuneitute lamah pawh an sawisel tawh bawk. Mahse truck khalhtute leh anmahni thlawptute chuan Covid khuahkhirhna dan siamte chu sût a nih hma chuan nawrh chhunzawm zel an tum thu an sawi thung.

Pathianni khan police-te chuan nawrh huaihawtte pui lo turin mipuite an chah a, an awmkhawmna hmuna an mamawh, gas leh thil dang va pete chu man theih an nih tur thu an sawi.