Myanmar sipai hotuin ASEAN palai leh Suu Kyi party member inhmuh phalsak

Myanmar sipai hotu, general Min Aung Hlaing chuan Cambodia aṭanga Association of Southeast Asian Nations (ASEAN) special envoy leh Aung San Suu Kyi-i party, National League for Democracy (NLD) member ṭhenkhatte inhmuh a remti

January 26-a video call hmanga Cambodia prime minister Hun Sen nena an inbiak ṭumin, General Hlaing hian ASEAN special envoy-in an ram a tlawh hunah, NLA member ṭhenkhatte hmuh a remtih thu a hrilh a ni. Mahse NLD member zingah tu ber nge a hmuh theih dawn tih erawh a la sawichiang lo niin he video meeting-a tel ve, Cambodia minister Kao Kim Hourn chuan a sawi.

Kim Hourn chuan ASEAN special envoy, Cambodia foreign minister Prak Sokhonna hian Suu Kyi-i erawh a hmuh theih a rinawm lo tih a sawi. Nikum February 1-a sipaiten civil sorkar thuneihna hnehchhuh a, thuneihna an chan aṭang hian Suu Kyi hi pawn chhuak thei loin hren nghal a ni a, thubuai pawh eng emaw zat siamsak a ni tawh. A thubuai siamsak hrang hrangah hian thiam loh chantir a nih hlawm chuan kum 150 vel thleng tan tir theih a ni ang.

NLA thupuangtu, Nay Phone Latt chuan ASEAN palai nena meeting neih chu an party chuan an remti dawn tih a sawi ve nghal bawk.

ASEAN chair ni mek, Cambodia hian ASEAN foreign minister's meeting neih turah, Myamnar ram chu non-political aiawhte tir turin a lo hrilh tawh a, sipai sorkar aiawh erawh chu meeting-ah hian sawm tel an tum lo a ni.