Australia-in kum 2 dawn hnuah ramri a hawng ve dawn ta

Australia chuan ramdang khualzinte tan February 21 aṭangin an ramri chu an hawng dawn tih prime minister Scott Morrison chuan nimin khan a puang a, hri leng vanga khawvela khuahkhirhna khauh ber leh rei ber chu tihtawpin a awm dawn ta a ni.

"Australia ramri khar tura thutlukna kan siam aṭangin kum hnih dawn a liam ta," tiin Morrison chuan national security cabinet nen meeting an neih zawhah a sawi. Visa neite tan "February 21 aṭangin ramri hawn a ni dawn", tiin a sawi a, hemi rual hian vaccine dose hniha la chin chauh pawm an ni dawn tih a sawi nghal bawk.

Kum 2020, March thla khan Australia sorkar chuan Covid-19 hri leng vangin invenna atan ramri a khar a ni. Khuahkhirhna kalpui a nih ṭan aṭang hian hun tam zawk chu an ram mipuite zin chhuah khap an ni a, hei bakah hian phalna pek chin mi tlemte chauh an ramah luh a phalsak bawk a ni.

Khuahkhirhna khauh tak kalpui a nih avang hian chhungkaw tam tak ṭhen hranin an awm phah a, an ram tourist industry lam pawhin a tuar nasa hle, sorkar pawhin sawiselna a tawh phah nasa a ni.

Ramri an khar avang hian thla tin USD tluklehdingawn 2.3 vel sumdawnna aṭangin an chan ziah niin Australian Chamber of Commerce and Industry chuan a tarlang.

Tun hnaiah sorkar chuan khuahkhirhna hi ram chhunga chengte leh zirlaite tan a thlahdul chho ṭan a, Covid-zero policy pawh titawpin, vaccine la rate pawh a sang chho tawh a ni.

Hri leng vanga ram tam takin ramri an kharte chu an hawng leh tawh a, ram tlemte chauhin ramri hi la kharin, an zingah hian Japan, China, New Zealand leh Pacific Island ramte an la tel.