Malaysia PM hlui nupui thubuai siamsak

Malaysia Prime Minister hlui Najib Razak-a nupui, Rosmah Mansor-i chu sorkar sum tam tham tak tihchingpen chungchang chhuina kal zelah dan kalha thiltia puhna thubuai 17 siamsak a ni.

Rosmah Mansor-i hi Nilaini khan Malaysian Anti-Corruption Commission chuan manin, zanah pawh an hreng zui a ni. Rosmah-i chuan an puhna zawng zawngah hian thiam lohna a nei lo niin a sawi.

Judge chuan Rosmah hi bail-na turin an ram pawisa ringgit maktaduai 2 (dollar 482,500) a bituk sak. Prosecutor-te chuan Rosmah-i passport hi an laksak tawh a, bail-a chhuah a nih pawhin thubuai siamsak a nihnaa thuhretute biakpawh khapsak turin court an ngen bawk. Prosecutor Gopal Sri Ram chuan court hnenah hian Rosmah-in thuhretute a bepawp a nih chuan amah ṭan zawnga statement siam turin a hmin thei a ni, a ti.

PM hlui nupui laka thubuai siamsak zingah hian sum chheprelha puhna pawh a tel a, he thubuaiah hian thiam loh chantir a nih chuan kum 15 thleng lungin tantir theih a nih bakah, a sum chheprelh leh dan loa a transfer zat aṭangin a let nga aia tlem lo chawitir theih a ni bawk.

Najib Razak-a in hrang hrang dapnaah pawisa vai tam tham tak leh desingner handbag, tlereuh leh sana manto chi te mansak a ni tawh a, heng an thil man hlut zawng hi dollar matkaduai 275 zet a tling a ni. Najib-a hian thubuai 32 a nei mek bawk a, sum chheprelh bakah thuneihna dik lo taka hmanga puhnate a tel.

US investigator-te chuan Najib-a thurualpuite chuan state investment fund, 1Malaysia Development Berhad (1MDB) aṭangin dollar tluklehdingawn 4.5 lachhuakin, heng zinga dollar maktaduai 700 chu Najib-a personal bank account-ah thun a ni a, dollar maktaduai 30 chu a nupui tlereuh leina atan hman a ni bawk tih an sawi. Mahse Najib hian an puhna hi a dik lo niin a sawi thung.