Pakistan-ah mihring pung chak

Pakistan ramah mihring an pung chak hle a, tuna an pun anga an pung chho zel a nih chuan kum 2030-ah chuan mihring tamna ram pali-na a ni pha dawn niin Dawn News chuan a tarlang.

Pakistan hi mihring tam lamah parukna a ni mek a, mahse report chuan sorkar leh thuneitu lamten family planning lam an ngaihsak tawh loh avangin mihring an pung chak hle niin a tarlang. An ram mipuite an punchak dan leh, hemi in nghawng a neih theih dan turte hi Karachi-a Dow University of Health Sciences-ah expert-ten an sawiho a ni.

Expert-te chuan family planning chungchanga inhrilhriatna ṭha zawk pek a ngaih thu sawiin, hmeichhiate zirtirna pek an ngaih thu te an sawi. Raicheha thi leh, nausen laia thi an tam chungchangte pawh an sawiho bawk.

Pakistan ramah hian tleirawl laia naupai hi 80% zet an awm a, kum naupangte innei an tam hi an ram mipui an pun chakna chhan pakhat nia sawi a ni. Hei bakah hian fa neih zat chungchangah hmeichhiaten thu an nei lo a, mipa neih an duhna te chu a chhan dang nia sawi a ni bawk a ni.

Kum 2017 August-a Pakistan Bureau of Statistics-in report a tihchhuahah, an ram mipui zat hi maktaduai 208 an tling. 1998-2017 chhungin an ram mipui, kum khata an pun chhohna hi 2.4% a tling a ni.