Philippines President thuneihna tam zawk pek tum

Philippines chuan an ram President chu thuneihna tam zawk pek a nih theihna turin dan siamṭhat a tum.

Congress chuan Human Security Act, 2007 chu siam ṭhat rawtin, a pawm thuai rin a ni a, he dan thar hnuaiah hian President Rodrigo Duterte chuan thuneihna zau tak neiin, a mi ngaihsan tak dictator Ferdinand Marcos-a thuneihna ang a nei thei tawh dawn a ni.

Dan siamṭhatna tura rawtna siam zingah hian thi tur hremna pekna chu hman thar leh, tang nghaisak phalna telh a ni. Facebook, Twitter leh social media danga an thil post aṭangin jail-ah intantir theih a ni dawn bawk a, thuhretute chu warrant awm loin man theih niin, thubuai siamsak loin ni 30 chhung hren theih an ni bawk ang.

He dan siamṭhat hi pawm a nih chuan Philippines rama human rights palzut chungchang sawichhuaktute a tih thinur hle rin a ni a, he dan thar hmang hian aw chhuah thei loa hrek an ni thei dawn niin an ngai. State official-te chuan an rama firfiakte chetna thleng ṭhin avangin he dan hi siamṭhat ngei a ngai tih an sawi a, mahse eptute chuan hei hi an chhuanlam mai nia sawiin Duterte-an a thuneihna tihlen a tumna leh a inluling tumna mai niin an sawi.

Duterte hian sawizui hlawh tak tak thu a sawichhuak fo a, eptu lamte pawh a ti thinur fo a ni. A thusawi zingah sawisel hlawh ber zinga mi chu Pathian a awm a rin loh thu leh, Pathian a awm tih an fiah theih chuan president a nihna aṭanga a ban tur thu a sawi chu a ni. He a thusawi hi Kristiante chuan an helh hle a, Catholic bishop chuan rilru buai niah a sawi hial a ni.