Israel PM-in US lawmthu a hrilh

Israel Prime Minister Benjamin Netanyahu chuan US nena record siama military deal an siam chu hmanṭan a nih tak avangin US hnenah lawmthu a hrilh.

US State Department thupuangtu Heather Nauert chuan Israel leh US-in kum 10 daih tur, dollar tluklehdingawn 38 hu military deal an siam chu Thawhṭanni aṭang khan hman ṭan a ni tih a sawi.

PM Netanyahu-a office chuan thuchhuah siamin, "America thuneitute leh Congress hnenah kum 10 chhung atana Israel nena thawkdun tura inremna an siam avang leh, aids fund an pek avangin lawmthu ka sawi a ni", a ti.

He inremna hi kum 2016, US President hlui Barack Obama hun laia ziah a ni. Netanyahu chuan Israel leh khawvel chuan security lam himna tichhe thei tur thil chi hrang hrang a hmachhawn reng a, a bikin Iran chetdante chu thlithlai reng a ngai niin a sawi. 

Israel-in a ram venhimna tura dikna chanvo a neihte US-in a thlawppui tlat chu ram pahnihte inlaichinna nghet tak a awm theihna pakhat a ni, a ti. He inremna siam hmang hian Israel chuan US aṭang hian kumtinin foreign military financing hnuaiah dollar tluklehdingawn 3.3 a dawng dawn a, kum 10 chhung hia missile defence programme lama thawhdunna turin kumtin dollar maktaduai 500 a dawng bawk ang.