SKorea president hlui kum 15 tang turin hrem

South Korea president hlui Lee Myung-bak chu eiruk thubuaiah thiam loh chantir a nih hnuin, nimin khan kum 15 tang tura hremna pek a ni.

Seoul court chuan president hlui hi thamna la, sum tichingpen leh thuneihna dik lo taka hmanga puh a nihnaah hremna hi pein, an ram pawisa won tluklehdingawn 13 ( dollar maktaduai 11.5) chawi turin a ti bawk.

Lee hi South Korea president hlui zingah jail-a tang tura hrem tawk pali-na a ni.

President hlui dang Park Geun-hye chu thuneihna dik lo taka hmang leh, sum thawh tura midangte nawr luia puhnaah kum 33 jail tang tura hrem a lo ni tawh bawk.

Nimina a chungthu ngaihtuah lai hian Lee hi a hriselna ṭhat tawk loh vangin court-ah a inlan thei lo a ni.

Seoul Central District Court judge chuan president hlui thil tihsual hi a len tham em avangin hremna na tak pek chu thil tihawm tak a ni tih a sawi. Court chuan president hlui hian electronics firm lian Samsung chariman Lee Kun-hee ngaihdam a nih theihna atan thamna sum tam thak tak a dawng tih a sawi a, mahse company hian president hlui hi sum an pe lo niin a sawi thung. Lee pawhin an puhnate chu thu dik lo nia sawiin, politics lama amah tihchhiat tumtute beihna niin a sawi.